காரியாபட்டி:
விருதுநகர் மாவட்டம் காரியாபட்டி அருகே ஏ.முக்குளத்தை அடுத்துள்ள ஆவாரங்குளம் (பிள்ளை யார் குளம்) கிராமத்தில் நேற்று மத்திய சுகாதாரத் துறை அதிகாரிகள் ஆய்வு செய்ய வந்தனர்.
அப்போது திட்ட பணிகள் சரிவர செய்வது இல்லை என முன்னாள் பஞ்சாயத்து தலைவர் சீனிவாசன் (வயது 42) அதிகாரிகளிடம் புகார் கூறினார்.
இதனால் அங்கு சலசலப்பு ஏற்பட்டது. அப்போது பணி பொறுப்பாளர் சசிகுமார் (32) என்பவர் அதிகாரிகளிடம் புகார் கூற வேண்டாம் என சீனிவாசனிடம் கூறியதாக தெரிகிறது. இதனால் அவர்களுக்குள் வாக்கு வாதம் ஏற்பட்டது. உடனே அங்கிருந்தவர்கள் சமரசம் செய்து வைத்தனர்.
இந்தநிலையில் நேற்று இரவு சீனிவாசன் தரப்பினரும், சசிகுமார் தரப்பினரும் திடீரென்று மோதிக் கொண்டனர். ஒருவரையொருவர் கம்பு, கற்கள் போன்ற ஆயுதங்களால் தாக்கிக்கொண்டனர், வீடுகளும் சூறையாடப்பட்டன. இதில் இருதரப்பை சேர்ந்த பலர் படுகாயம் அடைந்தனர்.
இதுகுறித்து சீனிவாசன், சசிகுமார் ஆகியோர் ஏ.முக்குளம் போலீசில் புகார் செய்தனர். போலீசார் இருதரப்பை சேர்ந்த 70-க்கும் மேற்பட்டவர்கள் மீது வழக்குப்பதிவு செய்து விசாரணை நடத்தினர்.
இந்தநிலையில் இருதரப்பினர் மோதலால் ஆவாரங்குளம் கிராமத்தில் பதட்டமான சூழல் உருவாகியுள்ளது. இதன் காரணமாக அங்கு ஏராளமான போலீசார் குவிக்கப்பட்டுள்ளனர்.
